17 Januarie 2022
Metropolisie departemente het ‘n beroep op mense gedoen om nié die verkeer te reguleer wanneer daar beurtkrag is nie.
Die woordvoerder van die Johannesburgse Metropolisie, Xolani Fihla sê metrobeamptes is aangestel om nie-amptelike puntsmanne te verwyder van verskeie besige kruisings.
Dit kom nadat verskeie videos en foto’s vandeesweek deur motoriste op sosiale media gedeel is, waarin gesien kan word hoe hawelose mense die verkeer probeer reguleer. Volgens Fihla is daar ‘n bepaalde risiko as diegene die verkeer aanwys omdat hulle nie behoorlik opgelei is nie.
Ook die woordvoerder van die Tshwane Metropolisie, Isaac Mahamba sê dit gebeur meer gereeld dat hawelose mense inspring wanneer die verkeersligte weens beurtkrag buite werking is.
Volgens hom het die Tshwane-metro ‘n plan om burgerlikes op te lei sodat hulle die metropolisie kan bystaan indien nodig.
Hy sê diegene wat nié opgelei is nie, moet eerder nie probeer om die verkeer te reguleer nie.
Foto: Zak Wood (Twitter)
