3 Augustus 2023
Die Johannesburgse-metro beoog om die beskadigde Breestraat (Lilian Ngoyi-straat) in die middestad binne 18 maande te herstel.
Die burgemeester van Johannesburg, Kabelo Gwamanda en die stadsbestuurder Floyd Brink het gister gesê hulle wil die straat so vinnig as moontlik heropen.
Herstelwerk gaan glo bykans ‘n R180-miljoen rand beloop.
Daar is ook bevestig dat ‘n metaangas-lekkasie gelei het tot die ontploffing verlede maand, maar dit is nog onseker waarvandaan dit gekom het.
Een persoon is dood en meer as 40 beseer in die ontploffing. Die spesialis-ingenieur, Johan la Grange, wat die ondersoek lei sê hulle vermoed daar was ‘n vonk van elektriese kabels wat die gas laat ontplof het.
