8 Augustus 2024
Chidimma Adetshina (23) het onttrek vanuit die Mejuffrou Suid-Afrika kompetisie nadat sy onder skoot gekom het oor haar nasionaliteit.
Verskeie sosiale media-gebruikers, organisasies en politieke partye het aangevoer dat sy nie Suid-Afrikaans genoeg is om deel te neem nie omdat haar pa oënskynlik ‘n Nigeriër is terwyl haar ma vermoedelik van Mosambiek afkomstig is.
Die departement van binnelandse sake het ook vanoggend aangekondig dat hy prima facie bewyse gevind het van bedrog en identiteitsdiefstal wat moontlik 23 jaar gelede gepleeg is deur die persoon wat in binnelandse sake se rekords as Adetshina se ma aangeteken is.
LEES OOK: Mej SA-deelnemer se ma bekyk vir identiteitsbedrog
Volgens die departement word Adetshina van blaam onthef aangesien sy ‘n baba was toe die bedrieglike aktiwiteite in 2001 plaasgevind het.
Sy het in ‘n verklaring op haar Instagram-profiel almal bedank vir hulle ondersteuning, en meen sy is dankbaar vir die liefde en ondersteuning wat hulle gekry het. “Mejuffrou Suid-Afrika was tot dusver ‘n wonderlike ervaring, maar na deeglike oorweging het ek die moeilike besluit geneem om te onttrek, vir my en my familie se veiligheid.”
Sy sê sy verlaat die kompetisie met ‘n dankbare hart.
