22 Junie 2022
Meer as 8 500 jong mense tussen 21- en 34 jaar oud is in die afgelope drie jaar in motorbotsings oorlede.
Luidens data deur die Padverkeersbestuurskorporasie (RTMC) sterf mense tussen 30- en 34 jaar in die meeste padongelukke. 3 661 was in dié ouderdomsgroep. Volgens die korporasie is die meeste van die jong mense in Gauteng oorlede.
Die uitvoerende hoof van die Padverkeersbestuurskorporasie, Makhosini Msibi sê hul is bekommerd oor die hoë aantal sterftes onder jong mense en beskou dit as ‘n epidemie.
Volgens hom dra motoriste se gedrag by tot padongelukke onder jong mense. “Hulle dra dikwels nie veiligheidsgordels nie, oortree die spoedgrens en bestuur onder die invloed van alkohol.”
1 380 mense in die ouderdomsgroep is in die afgelope drie jaar in Gauteng oorlede, gevolg deur 1 235 sterftes in KwaZulu-Natal en 1 201 in die Oos-Kaap.
