13 Junie 2023
Die VF Plus sê die omvang van munisipale korrupsie en bedrog onder verál ANC-beheerde munisipaliteite landwyd, is vandag weer belig tydens ʼn vergadering van die parlementêre portefeuljekomitee oor samewerkende regering en tradisionele sake.
Die Valke, Nasionale Vervolgingsgesag, en die Spesiale Ondersoekeenheid het bekend gemaak dat daar tans 647 sake van bedrog, korrupsie en geldwassery in munisipaliteite ondersoek word. Honderdmiljoene rand se belastinggeld is ter sprake.
Volgens die VF Plus-LP en hoofwoordvoerder oor samewerkende regering en tradisionele sake, Michal Groenewald sê in die Oos-Kaap word 46 sake ondersoek, 60 in die Vrystaat en 64 in die Noordwes-provinsie.
Groenewald meen dit is skreiend dat hierdie, meestal plattelandse munisipaliteite, skynbaar deur ANC-kaders geteiken word om hulself te verryk ten spyte daarvan dat inwoners reeds gebuk gaan onder ʼn verval in dienslewering weens onder meer ʼn lae inkomste.
“Só is munisipaliteite soos byvoorbeeld Maluti-a-Phofung (voormalige Qwaqwa) in die Vrystaat (13 sake), en Matlosana (Klerksdorp, Stilfontein, Orkney en Hartbeesfontein) in Noordwes (14 sake), reeds byna oor die afgrond gestroop van munisipale fondse en bates onder die ANC.”
