30 November 2022
Die Gautengse departement van onderwys sê hy sal nie voor die einde van die dag daarin slaag om ál die 2023 graad-1 en graad-8 leerders in skole te plaas nie.
Dié aankondiging kom ná vroeëre aankondigings dat alle leerlinge voor die einde van November ‘n akademiese heenkome sou hê.
Volgens sy jongste skatting het die departement meer as 268 000 leerlinge reeds aan skole toegewys, met die meerderheid daarvan – naamlik 135 465 – wat volgende jaar in graad-1 gaan wees.
Nagenoeg 31 500 leerlinge wat aansoek gedoen het weet nog nie in watter skole hulle volgende jaar gaan wees nie. Hiervan is meer as 23 000 volgende jaar in graad-8.
Die departement het sy verskoning aangebied aan ouers wie se kinders nog nie geplaas is nie.
