10 Januarie 2022
‘n Totaal van 1394 voornemende graad 1- en 8 leerlinge van Gauteng is nog nié in skole geplaas nie.
Die departement van onderwys in Gauteng het vanoggend terugvoer gegee oor die plasingsproses. 236 van die kinders wat nog nie geplaas is nie, moet vanjaar in graad 1 wees, terwyl 1158 van die ongeplaaste leerlinge in graad 8 moet wees.
Volgens die LUR vir onderwys in Gauteng, Matome Chiloane is 290 751 leerlinge wél in skole geplaas. Hy sê sy departement is hard aan die werk om te verseker dat alle kinders wel teen môre hulle skoolloopbaan kan begin.
In die Ekurhuleni distrik is 236 graad 1 leerlinge nie geplaas nie. In Kempton Park is 501 voornemende graad 8 leerlinge nog nie geplaas nie. In die Tshwane Wes distrik in Akasia en Theresa Park is 223 voornemende graad 8 leerlinge nog nie geplaas nie.
In Roodepoort het 434 graad 8 leerlinge nog nie ‘n plek in ‘n skool nie.
Volgens Chiloane is sy departement ook uiters bekommerd oor die aantal skole wat gevandaliseer word en het opnuut ‘n beroep op gemeenskappe gedoen om nie skole te teiken nie. Hy sê sedert 1 Januarie 2022 is 120 skole in die provinsie gevandaliseer, waarvan 24 gedurende die afgelope Desember vakansie.
488 skole word tans instand gehou, terwyl 878 klaskamers gebou word. Chiloane het ook belowe dat 297 nuwe skole in die pyplyn is met vier skole wat reeds vanjaar open. Die eerste skool, ‘n sekondêre skool open môre in Garankuwa in die noorde van Pretoria.
