7 Desember 2023
Die Suid-Afrikaanse Mediese Vereniging – wat 13 000 dokters in die openbare- en privaatsektor verteenwoordig – sê daar gaan ‘n ongekende uittog van medici wees indien president Cyril Ramaphosa die Nasionale Gesondheidsversekering-wetgewing onderteken.
Daar is ook gewaarsku dat die land se armste- en middelklasburgers die swaarste gaan kry weens verhoogte belasting wat dié gesondheidsorg moet befonds.
Dit volg nadat die Nasionale Raad van Provinsies Woensdag ten gunste van die wetsontwerp gestem het – wat daarop gemik is om universele gesondheidsorg vir alle Suid-Afrikaners te vestig.
Terwyl die Suid-Afrikaanse Mediese Vereniging, die Raad van Gesondheidsorgbefondsers en die Hospitaalvereniging van Suid-Afrika almal hul verbintenis tot universele gesondheidsdekking uitgespreek het, het hulle gesê die wetgewing ly aan fundamentele probleme – insluitend ‘n gebrek van insette of deelname van die bedryf – tydens die proses.
