4 Augustus 2021
Medelye stroom in vir ‘n 20-jarige student aan die NWU, wat die afgelope naweek tydens ‘n motorongeluk saam met vier ander mense dood is.
Die onderwysstudent, Marelize Steyn (oorspronklik van Askham in die Noord-Kaap) is dood toe sy Saterdagoggend 04:30 (31 Julie) in haar silwerkleurige Toyota Etios in die rigting van Ventersdorp op pad was en reg van voor teen ‘n Volkswagen Polo gebots het.
Die polisiewoordvoerder, kolonel Adéle Myburgh het aan die Potchefstroom Herald gesê “dat volgens die polisieverslag het die bestuurder van die silwerkleurige Volkswagen Polo eers agter ‘n wit Toyota Yaris in Potchefstroom se rigting gery voordat hy die Yaris verbygesteek en met die aankomende voertuig gebots het.”
Die bestuurder en drie passasiers van die Polo is op die toneel dood verklaar. ‘n Vierde passasier is ernstig beseer.
Die LaVaria dameskoshuis, waar Steyn ‘n inwoner was, het op hulle Facebook-blad hulde aan haar gebring. “Sy was ‘n beeldskone dame met ‘n hart van goud. Haar liefde vir die Here het deur haar geskyn.”
‘n Vriendin het op Facebook gesê dat die Hemel ‘n engel bygekry het. “Jou mooi hart, bright glimlag, en jou positiewe energie gaan so baie gemis word.”
Die NWU se onderwys fakulteit het ook hulde gebring en sê Steyn was deel van die span van klas verteenwoordigers. “Ons gebede gaan uit na haar familie en vriende toe.”
Hou Afrikaans op die lug
