16 Julie 2024
Die minister van sport, kuns en kultuur, Gayton McKenzie, sê hy is nie skaam om sy steun vir die “Die Stem”-gedeelte van die Suid-Afrikaanse volkslied uit te spreek nie.
Netwerk24 berig McKenzie het vandag in ’n debat in die Nasionale Vergadering oor sy eerste begrotingsrede vir “Die Stem” in die bresse getree.
Dit het gevolg nadat die EFF-LP, Fana Mokoena, gesê het dat daar van “Die Stem” ontslae geraak moet word, omdat dit volgens hom – soos die ou Suid-Afrikaanse vlag – kentekens van apartheid is.
Mokoena meen dit maak nie sin dat daar met die ou landsvlag weggedoen is, maar “Die Stem” behou is nie, omdat die twee volgens hom met mekaar verband hou en aanstootlik is.
Volgens McKenzie moet die Suid-Afrikaanse volkslied egter beskerm word en dui “Die Stem” – wat deel daarvan is – op hoe Suid-Afrikaners as ’n nasie gevorder het.
