17 September 2024
Die nasionale tesourie het vir eers ‘n stokkie gesteek voor die minister van sport, kuns en kultuur, Gayton McKenzie se planne om ‘n aantal standbeelde van leiers uit die vorige bedeling te verskuif.
McKenzie hou vol dat hy sal voortgaan met dié plan sodra die nasionale tesourie die geld daarvoor beskikbaar stel.
Hy het in antwoord op ‘n parlementêre vraag van die EFF se Thapelo Mogale gesê dat daar nie geld in die huidige boekjaar beskikbaar gestel is om die standbeelde te verskuif nie.
Mogale wou ook weet hoe naamsverandering in die land vorder, waarop McKenzie geantwoord het dat insette en steun deur munisipaliteiete en die publiek daarvoor nodig is – en dat dit deur die betrokke wetgewing gesteun moet word.
Die meeste naamsveranderinge tot dusver was in die Oos-Kaap. Volgens McKenzie hanteer die Suid-Afrikaanse Geografiese Naamsraad tans 66 aansoeke vir pleknaamveranderinge.
