17 Julie 2024
Die minister van polisie, Senzo Mchunu, sê sy departement beplan om 10 000 bykomende lede oor die mediumtermyn te werf om polisiegeledere te versterk.
Mchunu sê hoewel bykomende befondsing die afgelope twee boekjare gebruik is om 10 000 beamptes per jaar te werf, het hulle vanjaar besef dat hulle nóg meer beamptes sal moet aanstel.
Feitlik alle politieke partye in die parlement is dit eens dat bykomende befondsing nodig is om die hoë misdaadsyfer in die land doeltreffend te bekamp.
Daar is ook toenemend oproepe van politieke partye – en die burgerlike samelewing – dat die begroting vir BBP-beskermingsdienste gesny moet word en dat dié geld eerder aan ander polisie-eenhede toegewys word.
Mchunu het gister sy eerste begrotingsrede as die minister van polisie gelewer.
