17 Maart 2022
Die DA se lid van die KwaZulu-Natalse provinsiale wetgewer, Mbali Ntuli het bedank.
Sy het vanoggend in ‘n verklaring gesê dat haar bedanking noodsaaklik was en dat haar besluit nie maklik was nie. Sy het in haar brief gesê dat sy bepaalde uitdagings binne die party beleef het, maar meen die uitdagings is reeds verskeie kere in die media geopenbaar daarom wil sy nie daarop uitbrei nie.
Ntuli was ook die woordvoerder vir samewerkende regering en tradisionele sake. Sy het 15 jaar gelede by die DA aangesluit en het die party se eerste tak by die Rhodes Universiteit begin. “Ek het by die DA aangesluit omdat ek met my hele hart glo in verandering en die belangrikheid daarvan.”
Ntuli het in 2020 saam met die huidige leier, John Steenhuisen haar naam in die hoed gegooi vir die pos van die party se leier nadat Mmusi Maimane bedank het.
“Ek wil my kollegas bedank vir die groot rol wat hulle in my lewe gespeel het en hulle bydra tot my politieke groei.”
