19 Januarie 2024
Die Solidairteit Skoleondersteuningsentrum, die SOS sê hy is trots op die matriekklas van 2023, wat te midde van uitdagende omstandighede steeds baie goed presteer het.
Die groep kon ‘n slaagsyfer van 82,9% behaal, ‘n verbetering van 2,1%. Die Vrystaat het die beste gevaar, gevolg deur KwaZulu-Natal en Gauteng.
Die hoof van ontwikkeling by die SOS, Melanie Buys sê die matriekuitslae is een van die belangrikste barometers van die gesondheid van die Suid-Afrikaanse onderwysstelsel.
Buys vra egter die vraag of die uitslae ‘n ware weerspieëling is van die gehalte onderwys in Suid-Afrika. Sy sê die feit dat vanjaar ‘n verkiesingsjaar is, kan nie geïgnoreer word nie en politieke motiewe het duidelik ‘n rol in die minister se aanbieding van die uitslae gespeel.
Sy sê ondermeer die prestasie van provinsies soos Vrystaat en Kwazulu-Natal, wat tradisioneel nie as akademiese voorlopers beskou word nie, laat ook wenkbroue lig, veral in die lig van die Wes-Kaap se onverwagse vyfde plek.
“Goeie onderrig en betroubare standaarde, soos dié van die IEB, kan nie afgemaak word as
bevoorregting nie. Faktore soos ‘n sterk skoolhoof, ‘n gedissiplineerde onderwyskorps, ‘n kultuur
van werk en toewyding, lae afwesigheid van leerders en onderwysers, beperkte negatiewe
impak van vakbonde, goed opgeleide onderwysers en betrokke ouers is die rede vir die sukses
van ‘n skool,” sê Buys.
Sy sê alhoewel die matriekuitslae gevier moet word, moet ons ook erken dat ‘n slaagsyfer nie die
volle verhaal vertel nie.
