25 Januarie 2024
Die Nasionale Vervolgingsgesag (NVG) het bevestig dat die man – wat van die Marshalltown-geboubrand aangekla word – ‘n bekentenis gemaak het, wat in die hof gebruik kan word.
Lawrence Mdlalose het vandag in die Johannesburgse landdroshof verskyn, waar hy van 76 aanklagte van moord, 86 aanklagte van poging tot moord en ‘n aanklag van brandstigting, aangekla word.
Mdlalose het vroeër die week die skokkende onthulling – na aanleiding van die Usindiso-kommissie van ondersoek – gemaak, dat hy die gebou aan die brand gesteek het, toe hy bewyse van ‘n moord wat hy in een van die kamers in die gekaapte gebou gepleeg het, probeer wegsteek het.
Die NVG-woordvoerder, Phindi Mjonondwane, het die bekentenis bevestig.
