25 Julie 2022
Die VF Plus in die Mangaung-metro meen dat amptenare van dié munisipaliteit nié besorg is oor dienslewering nie omdat hul eerder nog amptenare gaan aanstel teen meer as R10-miljoen per jaar.
Die VF Plus-raadslid in die Mangaung-metro, dr. Elizabeth Snyman van Deventer sê die betrokke poste is in die kantore van die burgemeester, adjunk-burgemeester, speaker, hoofsweep en voorsitter van die openbare rekeningekomitee.
“Van die aanstellings sluit in die hoof van personeel (R1,3 miljoen per jaar) vir die burgemeester, kantoorbestuurders (R1,2 miljoen per jaar) vir die hoofsweep, speaker en adjunk-burgemeester, sowel as ʼn spesiale raadgewer (R1,1 miljoen per jaar) vir die burgermeester,” verduidelik Snyman Van Deventer.
Sy meen aanstellings soos ‘n raadgewer is onnodig aangesien die hoof van personeel in die burgemeesterskantoor hierdie rol kan vervul.
“Die posvlakke met die gepaardgaande pligte, kwalifikasies en ervaring, regverdig nie hierdie salarisse nie. In ag genome dat die metro onder nasionale ingryping geplaas is en hierdie aanstellings nie finansiële herstel bevorder nie, gaan die VF Plus die nasionale minister van finansies versoek om ondersoek in te stel na die aangeleentheid voordat enige aanstellings gemaak word,” sê sy.
Foto: Soweton
