4 April 2024
‘n 19-jarige man het vandag vir die eerste keer in die hof verskyn, byna drie jaar nadat ‘n plesierrit glo tot die 65-jarige Patrick Jewell se dood gelei het.
Kgaugelo Masenya het in die Brits-landdroshof verskyn op aanklag van strafbare manslag vir Jewell se dood. AfriForum se privaatvervolgingseenheid verteenwoordig Jewell se dogter, Jacky, in hierdie saak.
Volgens die eenheid se woordvoerder, Barry Bateman was Jewell op die betrokke dag op die sypaadjie buite sy huis besig om waterbottels in sy Hyundai i10 te laai om die blomme by sy vrou se graf te gaan natlei toe ‘n BMW om om die draai jaag en in Jewell tref.
Bateman sê Masenya se pa is ‘n kaptein by die SAPD se beskermings-en-veiligheidseenheid en daar word vermoed dat die SAPD se versuim om hierdie saak te ondersoek te wyte is aan polisiebeamptes wat vir hul kollegas skerm.
“Masenya word ook daarvan aangekla dat hy ’n voertuig sonder ’n lisensie bestuur het – hy was 16 ten tyde van die voorval.”
Bateman sê die saak sloer onnodig. “Ons vermoed dat die pa van die beskuldigde se titel in hierdie saak die rede was dat die saak nie ondersoek is nie. Dit beledig die beginsel dat almal gelyk is voor die reg en dit mag nie geduld word nie.
Die saak is uitgestel tot 10 April 2024
