6 Februarie 2022
‘n Man is dood nadat hy in sy motor in die oorstroomde Hennopsrivier in Centurion meegesleur is.
Die ER24-woordvoerder, Ross Campbell sê paramedici en ander nooddienste het omstreeks 08:00 vanoggend by die toneel aangekom. Hy sê dit is onduidelik hoe die motor in die rivier beland het, maar fietsryers het die motor gesien en die nooddienste ontbied toe hulle vermoed dat die bestuurder vasgekeer is.
LEES OOK: OPVOLG: VRYSTAATSE MAN IN VLOEDE MEEGESLEUR; DRIE IN GAUTENG VERMIS
Volgens Campbell was dit uiters moeilik om by die motor uit te kom, maar polisieduikers kon teen 13:00 vanmiddag daarin slaag om die man se liggaam uit die motor te haal. Hy is op die toneel dood verklaar.
Dit kom te midde van ‘n besige naweek vir nooddienste in groot dele van Gauteng waar kitsvloede en oorstromings voorgekom het.
