17 Februarie 2022
‘n Man, wat glo met vakansie was, is in die vroeë oggendure van vanoggend by die ATKV-Buffelspoort naby Rustenburg doodgeskiet.
Die polisiewoordvoerder, kolonel Adéle Myburgh het die voorval aan Pretoria FM bevestig en sê die 68-jarige Johannes Nicolaas Brits is op die toneel dood verklaar.
Myburgh sê Brits, sy vrou en vier ander familielede was met vakansie toe hulle omstreeks 01:00 deur verdagtes in hulle huisie wakker gemaak is. Hy is verskeie kere in die maag, bors en rug geskiet toe hy tussen beide getree het om sy familie teen die aanvallers te probeer beskerm. Twee selfone en juweliersware is gesteel.
Sy sê ‘n saak van moord en besigheidsroof word deur die Marikana polisie ondersoek. Nog niemand is in verband met die voorval in hegtenis geneem nie.
Die bemarkingsbestuurder van die ATKV, Reinard du Plessis wou nie meer besonderhede bekend maak nie en sê die polisie ondersoek die saak. Hy het wel gesê dat dit nou belangrik is om die familie te ondersteun.
