17 Mei 2024
‘n 45-jarige man van Algerië is ongedeerd gevind in sy buurman se kelder – 26 jaar ná hy vermis geraak het.
Omar Bin Omran van Djelfa was 17 jaar oud toe hy te midde van die Algeriese burgeroorlog in 1998 as vermis aangemeld is. Die BBC berig dat ‘n 61-jarige man in hegtenis geneem is in verband met die ontvoering en aanhouding van Omran.
Hy is sedert sy ontvoering in ‘n kelder van ‘n huis aangehou, slegs sowat 200 meter van sy ouerhuis.
Gedurende die 1990’s was die Algeriese regering gewikkel in ‘n 10 jaar lange konflik met Islamitiese groepe. Volgens die BBC het sy familie gevrees dat hy een van die 200 000 vermoorde landsburgers was, of dat hy soos 20 000 ander mense ontvoer is.
Omran het aan plaaslike media gesê dat hy talle kere sy familie deur die kelder se venster gesien het, maar kon nie na hulle roep nie “omdat hy deur die verdagte gebreinspoel is.”
