18 Junie 2021
Die voormalige minister, Malusi Gigaba sê sy vervreemde vrou, Norma Mngoma is “lief vir geld en sal enigiets doen vir geld.”
Dit was onder meer van Gigaba se getuienis vanoggend voor die Zondo-kommissie van ondersoek na staatskaping. Volgens hom wou sy by hom weet wat hy met sy pensioen sou doen, sodra hy nie meer ‘n minister is nie.
Hy meen selfs terwyl sy eie toekoms onseker is, is Mngoma “lief vir geld en lei ‘n luukse lewe.”
Volgens hom werk hy vir die ANC en meen “omdat dit nie so goed gaan met die ANC se geldsake nie, is dit belangrik dat hy moet spaar.” Gigaba sê sy het self erken dat sy niks met R 3000 kan doen nie.
Gigaba moes ook weer sy weergawe van gebeure gee toe Mngoma in Maart vanjaar by hulle huis in hegtenis geneem is. Volgens die getuienisleier, advokaat Anton Myburgh is dit nou bekend dat Mngoma na bewering ‘n familievriend se Mercedes-Benz G-Wagon 63 met ‘n groenteskiller gekrap het.
Sy het vroeër in haar getuienis aangevoer dat sy voor haar minderjarige kinders in hegtenis geneem is, maar volgens Gigaba is dit onwaar omdat die polisie elke keer gevra het dat die kinders eers verwyder moet word.
Die voormalige minister hou vol dat Mngoma jok in haar getuienis omdat sy bitter is oor die feit dat hulle skei.
