30 Januarie 2023
Die leier van die EFF, Julius Malema en sy lyfwag Adriaan Snyman het vandag weer in die streekhof in Oos-Londen verskyn.
Die burgerregteorganisasie, AfriForum het klagtes teen Malema ingedien ná beeldmateriaal aan die lig gekom het waar dit lyk of Malema ’n vuurwapen in die openbaar afvuur. Die wapen is deur Snyman aan Malema gegee.
Die Nasionale Vervolgingsgesag (NVG) vervolg Malema vir die afvuur van ’n vuurwapen in ’n beboude of openbare gebied sonder goeie rede om dit te doen, asook die besit van ’n vuurwapen en ammunisie sonder die nodige lisensie en magtiging.
Volgens AfriForum se woordvoerder vir gemeenskapsveiligheid, Jacques Broodryk het die aanklaer vandag besluit om die beeldmateriaal in die hof te wys. Malema en Snyman se prokureurs het egter hierteen geargumenteer en gesê dat die geldigheid van die video nie bewys kan word nie, en ook dat die bron van die video nie bevestig kan word nie.
“Die staatsaanklaer adv. Joel Cesar het aangevoer dat twee ooggetuies wat op die toneel teenwoordig was, reeds getuig het dat die gebeure wat in die video uitgebeeld word, wel plaasgevind het.”
Broodryk sê Malema se regspan het ’n “verhoor binne ’n verhoor” versoek om te bepaal of die beeldmateriaal toegelaat moet word. Die saak is tot 31 Januarie.
