24 Oktober 2023
Die EFF-leier Julius Malema sê sy party sal alle Israeliese produkte van die winkelrakke verwyder, as winkels dit nie uit vrye wil gaan doen nie.
Malema het gister ‘n optog gelei na die Israeliese ambassade in Lynnwood in Pretoria. Volgens hom is talle produkte op Woolworths se winkelrakke van Israel afkomstig. Hy het ook gevra dat McDonald’s Suid-Afrika afstand doen van McDonald’s Israel aangesien hulle gratis etes verskaf het aan Israelse soldate.
Die winkelgroepe het nie op Malema se uitlatings gereageer nie.
Malema het ook gesê sodra die EFF regeer, sal hy wapens en ammunisie aan die militante groep Hamas verskaf, om hul geveg teen Israel voort te sit.
Die EFF eis ook dat die Israeliese ambassade se deure gesluit word.
Malema sê die ANC-regering is bang om die ambassade te sluit, omdat die staat geld van die Israeliese regering ontvang om die ambassade te huisves.
