1 Februarie 2022
Die organisasie, Freedom Under Law (FUL) sê die EFF-leier, Julius Malema en advokaat Dali Mpofu moet hulself onttrek van die paneel, wat vandeesweek onderhoude voer met kandidate vir die pos van hoofregter.
Dié regtelike dienskommissie (RDK) se paneel, wat deur die adjunkhoofregter van die appélhof Xola Petse gelei word voer tot Vrydag onderhoude met die vier kandidate vir dié pos nadat die voormalige hoofregter, Mogoeng Mogoeng se termyn verlede jaar tot ‘n einde gekom het.
LEES OOK: ONDERHOUDE VIR NUWE HOOFREGTER BEGIN
FUL sê in ‘n verklaring dat Malema voorheen daaraan skuldig bevind is dat hy die parlement se etiese kode oortree het toe hy onvanpaste vrae aan kandidate vir regter-poste gestel het.
“Ons is bekommerd dat Malema die RDK gebruik om sy eie belange te bevorder,” lui die verklaring.
In die geval van Mpofu, word hy tans deur die Legal Practice Council (LPC) ondersoek nadat hy glo verlede jaar aan ‘n kollega en haar kliënt by die Zondo-kommissie gesê het dat hulle moet “shut up.”
