2 Julie 2024
Die finansiëledienstemaatskappy, Everest Wealth sê die Suid-Afrikaanse Inkomstediens se outo-aanslag sluit nie noodwendig alle inligting in nie.
Die maatskappy maan belastingpligtiges om nie net gelate te aanvaar dat die aanslag korrek is nie
Volgens die hoof van adviesdienste by Everest Wealth, Riaan Grobler, kan die nalate om die aanslag na te gaan daartoe lei dat ʼn belastingbetaler minder geld terugkry as waarop die persoon geregtig is, of dat die persoon later selfs gepenaliseer kan word.
Grobler sê om bloot ʼn outo-assessering te aanvaar sonder om die inligting te verifieer kan egter ook veel meer verreikende gevolge inhou as om nie ʼn terugbetaling te ontvang nie. “Dit kan tot gevolg hê dat ʼn belastingbetaler later gepenaliseer word omdat ander belangrike inligting, soos bykomende inkomste, nie verklaar is nie.”
Die SAID wil vanjaar sowat 4,8-miljoen belastingbetalers outomaties aanslaan – byna 1-miljoen meer as verlede jaar.
Outomatiese assesserings word tussen 1 en 14 Julie gedoen en belastingbetalers sal vanaf 15 Julie hul opgawes kan indien. Belastingbetalers het tot 21 Oktober om hul belastingopgawes in te dien.
