18 Oktober 2024
Die Gautengse LUR vir onderwys, Matome Chiloane, het die matriekgroep van 2024 versoek om hul fokus te behou gedurende hierdie eksamentydperk, wat Maandag, 21 Oktober begin.
Die departement het vroeër ’n seremonie vir die ondertekening van ‘n onderneming by Ahmed Timol Sekondêre Skool in Krugersdorp gelei.
Die seremonie gaan daaroor om elke leerling se integriteit en toewyding voor die eksamen te bevestig.
Die Gautengse Onderwysdepartement het intussen sy gereedheid vir Maandag bevestig, wanneer die matrieks regoor die land met hulle eindeksamen begin.
Die Suid-Afrikaanse Onderwysersunie (SAOU) sê die aanvang van die 2024 NSS-eksamens dui vir die onderwyssektor die naderende einde van die skooljaar aan.
Die SAOU meen die NSS-eksamens is egter baie meer omvattend as net die 700 000 kandidate wat die eksamen aflê.
Die vakbond se uitvoerende hoof, Paul Sauer sê vir die onderwyssektor is dit die “toets” van ‘n 13 jaar kwalifikasie en die resultaat van die insette wat ‘n groot hoeveelheid onderwysers oor jare in die lewe van ‘n kind belê het.
