31 Mei 2021
Ouers, oud-leerlinge en huidige leerlinge van Cornwall Hill Kollege in Irene, Pretoria het vanoggend ‘n plakkaat-betoging buite die skool gehou weens bewerings van rassisme.
Die LUR vir onderwys in Gauteng, Panyaza Lesufi is ook sedert vroeg vanoggend by die skool om die bewerings te ondersoek.
‘n Huidige leerling van die skool het vanoggend ‘n toespraak gehou en vertel van bewerings van rassisme teen haar en mede-leerlinge.
Volgens haar was sy in graad 4 die eerste keer, wat ‘n onderwyser na bewering ‘n uitlating oor haar hare gemaak het. Die leerling meen die onderwyser het gesê dat haar hare nie aanvaarbaar en netjies is nie.
Lesufi het tydens ‘n toespraak by die skool gesê dat Cornwall Hill ‘n skool moet wees waar alle leerlinge welkom kan voel sonder enige “diskriminasie” teen hulle. Hy meen rassisme stop vandag.
Hy sê die departement sal die beleid van die skool hersien om seker te maak dat dit leerlinge en personeellede van alle rasse verteenwoordig.
Cornwall Hill Kollege het vroeër in ‘n verklaring gesê dat die skool steeds daarin poog om nie te diskrimineer op grond van ras nie.
Volgens die uitvoerende hoof, Leon Kunneke was daar tydens die skool se onlangse jaarlikse gholfdag ‘n vreedsame betoging oor ouers en leerlinge se eise vir diversiteit en transformasie.
Hy sê die skool het in 2020 ‘n raad saamgestel om die beleid te hersien en om te verseker dat daar aandag geskenk word aan leerlinge en ouers se kommernisse.
