11 Oktober 2023
Baie mense het ‘n vrees vir wiskunde, máár danksy ‘n juffrou van Boshof in die Vrystaat én haar agtergrond in drama kan die leerlinge in haar klas wiskunde beter verstaan.
Johané Marais, ‘n onderwyseres aan die Boshof Combined School is tydens die Nasionale onderwysdepartement se toekenningsgeleentheid aangewys as die beste wiskunde onderwysers vir graad 7 tot graad 9 leerlinge.
Sy het tydens ‘n onderhoud met James Kemp gesê dat sy haar liefde vir die kunste en wiskunde kombineer omdat kinders altyd skrik as hulle die woord; “wiskunde” hoor. Sy sal dikwels liedjies opmaak om basiese beginsels van wiskunde te verduidelik, en ook speletjies skep.
Volgens Marais is sy ‘n gebore onderwyseres met talle familielede wat onderwysers is. Sy het haar pa, ook ‘n wiskunde onderwyser, as jong kind gehelp om wiskunde vraestelle te merk.
