12 Julie 2022
Twee beamptes van die Tshwane metropolisie is gisteraand in hegtenis geneem, na hulle glo ’n motoris van Pretoria afgepers het om omkoopgeld aan hulle te betaal.
Die TMPD beamptes het die vrou Sondagoggend by ’n padblokkade in Erasmuskloof in Pretoria afgetrek.
Die beamptes het haar daarvan beskuldig dat sy met ‘n ongeldige registrasiedokument rondry.
Die burgemeesterskomiteelid vir gemeenskapsveiligheid Grandi Theunissen het Sondag toevallig verby die padblokkade gery waar die beamptes probeer het om die vrou af te pers.
Theunissen het die vrou aanbeveel om die motorhandelaar te skakel om die registrasiedokumente van haar voertuig te bevestig.
Na daar toe bevestig is dat die dokumente wel geldig is, en die geskil tussen die vrou en die metropolisiebeamptes opgeklaar is, het Theunissen die toneel verlaat.
Die TMPD beamptes het egter toe voortgegaan met hulle pogings om die vrou af te pers. Hulle het haar beveel om R3,000 se kontant te onttrek by ’n nabygeleë OTM.
Die OTM het nie gewerk nie, en die vrou het toe na haar huis gery.
Die TMPD beamptes het haar toe agtervolg, en haar voor haar hek gedwing om die R3,000 oor te betaal via e-Wallet.
Die vrou het gister klagte teen die beamptes aanhangig gemaak by die Garsfontein polisiestasie.
Anton Meijer het vanoggend met Theunissen gesels. Luister hier na die onderhoud:
