24 Januarie 2023
‘n Skaars olieverf skildery, wat met voëlmis bedek was, is in ‘n skuur in New York in Amerika gevind, en kan volgens kunskenners vir tot R51-miljoen verkoop word.
Volgens die afslaersmaatskappy, Sotheby’s is dié skildery, van ‘n naakte man op ‘n stoel, geskilder deur die Vlaamse skilder, Anthony van Dyck.
Die skildery is waarskynlik tussen 1615 en 1618 geskilder, en was deel van Van Dyck se selfstudie. Die kunshistorikus, Susan Barnes sê dié skildery is verbasend goed bewaar, ondanks die feit dat dit in ‘n verlate skuur was.
Sy sê die skildery van byna 1 meter lank is een van slegs twee skilderye uit Van Dyck se selfstudie, wat gevind is.
