1 Maart 2022
‘n Suid-Afrikaner, wat in Kiëf woon, Kobus Olivier sê die situasie in dié hoofstad is gespanne.
Olivier, wat die uitvoerende hoof van die Oekraïnse Krieketfederasie asook ‘n skoolhoof van ‘n private skool is, het vanmiddag aan Klankkoerant gesê dat almal in dié stad hulle asems ophou te midde van ‘n verwagte aanval binne die volgende paar dae – selfs nog vanaand.
Intussen het die Verenigde Nasies (VN) se vlugtelingeagentskap aan die BBC gesê dat meer as 660 000 mense reeds teen Maandagmiddag (28 Februarie) Oekraïne verlaat het in ‘n poging om ‘n veilige hawe te soek.
Die Europese Unie (EU) voorspel egter dat nagenoeg 4-miljoen mense gaan probeer om te vlug nadat Russiese troepe die land op 24 Februarie binnegeval het.
Tans vlug die meeste Oekraïnse landsburgers na Pole, Roemenië, Slowakye, Hongarye en Moldawië. Volgens die BBC lyk dit asof die meeste mense na Pole is, met ongeveer 377 000 wat reeds híér ‘n heenkome soek.
Volgens die Poolse regering verwelkom hy elke dag sowat 50 000 Oekraïnse vlugtelinge.
