21 April 2022
Die vermoorde egpaar van Levubu in Limpopo was jare lank deel van die Louis Trichardt-gemeenskap waar hulle ook gemeentelede van die Gereformeerde Kerk op die dorp was.
Die kerk se predikant, ds. Innes Nagel het vanmiddag in ‘n onderhoud op Klankkoerant gesê dat Louis (71) en Ina Cloete (60) steunpilare in die gemeenskap was. Die egpaar is gistermiddag in hulle plaashuis aangeval, waarna die verdagtes die huis aan die brand gesteek het. Hulle liggame is onherkenbaar verbrand.
LEES OOK: PLAASMOORDENAARS STEEK HUIS MET BEJAARDE EGPAAR IN, AAN DIE BRAND
Die voorsitter van die Soutpansberg-distrikslandbou-unie, Fanie Havenga sê dat ‘n lid van die plaaslike plaaswag ondersoek gaan instel het toe hy rook by die huis sien.
Hy het in die rigting van die huis gery, waarna hy gesien het hoe twee mans in Louis se Corsa-bakkie sit. Die lid wou by hulle weet wat by die huis aangaan waarna hulle uit die bakkie gespring en weggehardloop het.
Intussen het die polisiehoof in Limpopo, luitenant-generaal Thembi Hadebe ‘n taakspan saamgestel om die verdagtes vas te trek.
Luister hier na die onderhoud.
