3 Julie 2023
‘n Wes-Kaapse ma wat meer as 1600 km op haar 1964 Massey Ferguson-trekker van Gauteng tot in Klapmuts gery het, het Saterdagmiddag (1 Julie) veilig by die Babylonstoren-wynplaas aangekom.
Corné Els het dié reis aangepak in ‘n poging om geld in te samel vir haar 16-jarige dogter, Marconette wat in Augustus in die wêreldkampioenskap vir toutrek in Switserland wil deelneem. Marconette is in die o.23-span in die kategorie vir spanne wat in totaal nie meer as 500 kg mag weeg nie.
Els het op 19 Junie in Gauteng weggetrek en wou minstens R100 per elke kilometer wat sy ry insamel. Sy het nie gedurende die reis gekyk hoeveel geld ingesamel is nie, maar teen Sondagoggend toe sy wel kyk, het die bedrag op R108 000 gestaan.
“Dit was nie heeltemal my mikpunt nie, maar ek is dankbaar vir elke sent. Marconette sal Switserland toe kan gaan.” Die Massey Ferguson bly nou by die Babylonstoren-wynplaas nadat hulle hom by die Els-gesin gekoop het.
Sarina Bosman het tydens Klankkoerant middag met Els gepraat.
