3 Desember 2021
Tegnici van die Tshwane-metro het gisteraand begin om die Mooikloof substasie op te ruim, na afloop van die brand Woensdagaand by dié substasie.
Die metro het in ‘n verklaring gesê dat daar ongeveer 26 panele is, wat in die brand verwoes is. Volgens die verklaring het die tegnici egter reeds aangedui dat hulle binnekort panele sal kan kry om die beskadigdes te vervang.
Daar word nog ondersoek ingestel oor die oorsaak van die brand.
Die metro sê tegnici sal nou onverpoosd werk om die substasie te herstel, maar het gewaarsku dat die proses tot en met nege dae lank kan duur, voor die kragtoevoer weer herstel is.
Verskeie woonbuurte in die ooste van Pretoria sit sonder krag, onder meer Morelata Park, Pretorius Park, Mooikloof, Olympus, Woodlands en dele van Garsfontein.
