10 Mei 2023
Die voormalige Gautengse LUR vir gesondheid, Qedani Mahlangu, sal vandag voortgaan om kruisondervra te word in die Life Esidimeni-geregtelike doodsondersoek in die hooggeregshof in Pretoria.
Sy is besig om te getuig oor haar rol in die omstrede besluit wat gelei het tot die verskuiwing van meer as drie-duisend psigiatriese pasiënte vanaf Life Esidimeni-fasiliteite – waartydens 144 dood is.
Sommige is dood terwyl hulle in 2016 by swak toegeruste en ongelisensieerde nie-regeringsorganisasies geplaas is.
Mahlangu het gister gesê dat dit nie háár verantwoordelikheid was om toe te sien dat die betrokke organisasies aan al die nodige vereistes voldoen nie.
Sy het tydens haar getuienis ook gesukkel om die vraag te beantwoord wie die finale besluit geneem het om die Life Esidimeni-kontrak te beëindig as ‘n kostebesnoeiingsmaatreël vir die departement.
