Nuuskommentaar: 15 Augustus 2022
Deur: Mari Oosthuizen
Die doel van hierdie nuuskommentaar is nié om dweperig te klink nie, maar miskien is die oplossing tot al die land se probleme eenvoudiger as wat die regering dink.
Die oplossing vir armoede, werkloosheid, misdaad, onwettige myners en korrupsie is nie noodwendig taakspanne, mediakonferensies en kommissies nie – miskien is dit om net weer terug te draai na die Here en dit wat ons van kleins af geleer is oor liefde en verdraagsaamheid in werking te stel.
Tydens Saterdag se Mejuffrou Suid-Afrika kroning is ‘n kykersvraag aan die top 3-finaliste gevra. “Hoe dink jy kan eenheid in Suid-Afrika herstel word?”
Hierdie vraag het my bietjie laat dink oor wat ‘n goeie antwoord sal wees. Ek dink nie mense gun mekaar meer ‘n plekkie in die son nie. Dit is belangrik vir almal om hulle stemme te laat hoor, opinies word nie in ag geneem nie, politici wil die heeldtyd bewys dat hulle die antwoord tot al die probleme is, organisasies bied wel oplossings, maar dit sal nie noodwendige die dringende oplossing bring wat Suid-Afrika nou nodig het nie.
Ek hou daarvan om myself as ‘n positiewe mens te beskou, maar deesdae is dit moeilik om positief te bly. Mense is kwaad. Kwaad vir die probleme, kwaad oor die onsekerheid van die toekoms en kwaad oor misdaad.
Hierdie woede is heeltemal geregverdigbaar, maar wanneer ons – almal as Suid-Afrikaners – begin om mekaar aan te val met woede – is dít dalk die punt waar introspeksie gedoen moet word.
As kind het ouers of onderwysers jou gou eenkant toe geneem en ‘n sogenaamde “time out” gegee om rustig te raak. Kom ons as Suid-Afrikaners gaan kamer toe en neem bietjie ‘n “time out” eerder as om woede opmekaar uit te haal.
Sodra jy verskil van iemand se opinie, dan moet jy jouself regmaak vir ‘n konfrontasie. Is dit regtig hoe die Here sal wil hê Sy kinders met mekaar moet omgaan? Of jy dit nou wil hoor of nie, die Here het almal geskape, wit en swart, man en vrou. Miskien kan jy nie jou buurman verdra nie, vir welke rede ookal, maar ons moet steeds mekaar met liefde, respek en verdraagsaamheid behandel.
Die Bybel sê baie duidelik in Johannes 15 vers 12: “Dit is my gebod, dat julle mekaar moet liefhê net soos Ek julle liefgehad het.” Jy stem heel moontlik nie saam met sekere mense se menings en optredes nie, maar ons moet mekaar liefhê en respekteer. Dit is eintlik heel eenvoudig.
