31 Mei 2022
Die Gautengse LUR vir onderwys, Panyaza Lesufi, het uitgevaar teen kritici van die Wysigingswetsontwerp op Basiese Onderwyswette en sê dit kan dien as ‘n moontlike oplossing vir – wat hy noem – die rasseskeiding in skole.
Lesufi skryf dié sogenaamde rasseskeiding onder andere toe aan skole se onderskeie taalbeleid.
Hy sê hy het teenstand teen die voorgestelde wysigings verwag en het ‘n beroep op die minister van basiese onderwys, Angie Motshekga, gedoen om vas te staan en toe te sien dat die wetsontwerp deur die parlement aanvaar word.
Lesufi het dié uitlatings gemaak tydens die maatskaplike- en bestuursgroepering se inligtingsessie na afloop van sy begrotingspos in die wetgewer.
Hy het weerstand teen die Bela-wetsontwerp as “teen-transformasie” bestempel en gesê die regering sal voortgaan om ‘n minimum van drie tale per skool te hê.
Volgens hom moet nierassigheid in die klaskamer begin.
