8 Oktober 2024
AfriForum sê die Gautengse premier, Panyaza Lesufi, is na bewering ’n kernfiguur in ’n grootskaalse toesmeerveldtog van ongebreidelde korrupsie, geldwassery en bedrog.
Volgens dié burgerregteorganisasie is honderde-miljoen-rand – wat aan die provinsiale departement van maatskaplike ontwikkeling toegewys is om aan maatskappye sonder winsoormerk toe te ken – hierby betrokke.
In ‘n verklaring sê AfriForum se privaatvervolgingseenheid dat hy deur ‘n fluitjieblaser genader is om die betrokke amptenare en ander individue strafregtelik aanspreeklik te hou vir hierdie optrede wat al vir byna ’n dekade aan die gang is.
Die privaatvervolgingseenheid sê hy het talle forensiese verslae onder oë gehad oor die toewysing van fondse aan nie-regeringsorganisasies vir die implementering van voedselbank-, skooluniform- en waardigheidspakkie-programme.
Volgens die eenheid is 13 amptenare – wat vroeër geskors is – weer terug by die werk sonder dat stappe teen hulle gedoen is.
