11 Oktober 2021
Die Gautengse LUR vir onderwys, Panyaza Lesufi het weer ‘n steek na die Noord-Kaapse gemeenskap op Orania ingekry, nadat hy op die sosiale media gesê het dat Orania tot niet gemaak gaan word.
Lesufi het hom in dieselfde twiet ook uitgespreek teen die VF Plus se verkiesingsmanifes waarin dié party hom beywer vir die beëindiging van Swart Ekonomiese Bemagtiging (SEB).
Volgens sy plasing sal sogenaamde regstellende aksie toegepas word “totdat die sondes van die wit-voorvaders uitgewis is.” Hoewel die VF Plus een van die meer uitgesproke partye oor SEB is, het Lesufi nie is sy twiet aangedui hoe hy die VF Plus se manifes by die bestaan van Orania uitbring nie.
Die uitvoerende hoof van die Orania-beweging, Joost Strydom het in reaksie op Lesufi se twiet gesê dat Orania op die toekoms fokus en dat die LUR deur die verlede vasgehou word. “Orania se reaksie op leë kritiek was nog altyd om nog vinniger te groei, beter dienste te lewer en meer doeltreffend na ons gemeenskap om te sien.”
Strydom meen terwyl Orania se bevolking jaarliks met 10% groei, nuwe besighede met 25% elke jaar groei, skole vinnig groei en kinders toerus met ordentlike opleiding, is Lesufi se enigste inset om sukses te kritiseer. “Ons sien egter nie dat hy suksesvol is om enige van die onderwys-uitdagings in sy provinsie aan te spreek nie,” meen Strydom.
Hy sê verder dat Orania geen hulpbronne of geld van die staat ontvang nie, en dit ook só verkies.
“Sou ons egter die R300-miljoen gehad het wat vermors is op sogenaamde ontsmetting van skole in Gauteng, sou ons die ongelooflike ontwikkeling van ons skole en tersiêre onderwys wat reeds suksesse is, na ‘n volgende vlak kon neem.”
Dit is nie die eerste keer wat Lesufi poog om swaarde met dié gemeenskap te kruis nie.
Verlede jaar het Lesufi hom reeds teen die bestaan van Orania uitgespreek en daarop gesinspeel dat Orania bevry moet word.
Stem vir die Aitsa’s
