26 Julie 2023
Lauren Dickason (42) het op die negende dag van haar moordverhoor aangevoer dat sy “haar drie dogtertjies uit liefde vermoor het.”
Haar regsverteenwoordiger, Anne Toohey het in die hof aangevoer dat Dickason haar eie lewe wou neem, maar dat sy nie wou hê dat haar kinders sonder ‘n ma moes grootword nie. Sy meen Lauren het nie haar kinders uit haat vermoor nie, maar dat sy verwyder was van die werklikheid.
Sy word daarvan aangekla dat sy haar drie dogtertjies, Liané (6) en die 2-jarige tweeling, Karla en Maya in September 2021 vermoor het kort na die gesin vanuit Suid-Afrika na Timaru, Nieu-Seeland geëmigreer het.
Dickason sal nie self getuig nie, maar die verdediging sal talle getuies roep om te kan getuig oor Dickason se geestesgesondheid en hoe dit met haar gegaan het kort voor die moorde. Toohey het aangevoer dat Dickason in “‘n donker gat was, en dat sy ernstige selfdoodneigings gehad het.”
Volgens Toohey is die moord nie vooraf beplan nie, en was ‘n impulsiewe besluit. “In die weke voor die moorde was sy uiters depressief, en sy was moedeloos oor alles. Daar was onweer in Nieu-Seeland en die huis was klein.”
