8 Desember 2023
Die polisie het ’n lasbrief uitgereik vir die inhegtenisneming van Francois Swart, die besturende direkteur van die reisagentskap Priority Escapes.
AfriForum se privaatvervolgingseenheid sê Swart het na bewering verskeie voornemende vakansiegangers uit honderdduisende rande geswendel. Die eenheid verteenwoordig twee klaers wat in Augustus ’n strafregtelike klag teen Swart by die Modimolle-polisiestasie ingedien het.
Die hoof van die privaatvervolgingseenheid, advokaat Gerrie Nel sê die klaers het die totale bedrag aan die verdagte oorbetaal om hul vakansie te reël en hy het dokumente aan hulle gestuur om te bevestig dat die nodige vlieg- en verblyfreëlings getref is. Dié dokumente was egter vervals.
Nel sê sy kliënte is na bewering uit meer as R130 000 geswendel.
“Die Suid-Afrikaanse Polisiediens (SAPD) het op 7 Desember bevestig dat ’n J50 lasbrief vir arrestasie wel uitgereik is vir Swart.”
Nel sê hy hoop dat hierdie saak nou die aandag sal kry wat dit verdien.
