15 Mei 2023
Die president van Oekraïne, Wolodimir Zelenski sê enigiemand wat Rusland bewapen is medepligtig in die voortslepende oorlog.
Sy uitsprake volg na hy Saterdag in ‘n telefoongesprek met President Cyril Ramaphosa was, oor die bewerings dat Suid-Afrika wapens en ammunisie aan Rusland verskaf het.
LEES OOK: VSA MOET REGERING STRAF EN NIÉ LANDSBURGERS NIE, VRA SOLIDARITEIT
Die Amerikaanse ambassadeur na Suid-Afrika, Reuben Brigety het verlede week ‘n storm veroorsaak nadat hy tydens ‘n mediakonferensie gesê het dat die VSA genoegsame bewyse het dat Suid-Afrika Rusland bewapen het.
Hy het intussen met die minister van internasionale betrekkinge en samewerking, dr. Naledi Pandor vergader en toegegee dat hy nie die regte kanale gevolg het nie. Hy het ook om verskoning gevra aan Suid-Afrika se regering en sy landsburgers.
LEES OOK: AMERIKAANSE AMBASSADEUR GEE TOE DAT HY NIÉ DIE REGTE KANALE GEVOLG HET NIE
Zelenski het in die telefoongesprek ’n beroep op Ramaphosa gedoen “om, saam met ander lande te help om Oekraïne se formule vir vrede te implementeer”.
Die Suid-Afrikaanse regering ontken die bewerings en het Amerika gevra om hul bewerings te staaf.
