17 September 2023
Die Nasionale Seereddingsinstituut (NSRI) het bevestig dat een persoon dood is, nadat fratsgolwe gister groot skade aan vakansiehuise en ander eiendom in die Wes-Kaap en Suid-Kaap aangerig het.
Die slagoffer was ‘n 93-jarige vrou. Een man is glo ook na ‘n hospitaal geneem.
Dit volg nadat die Suid-Afrikaanse Weerdiens vroeër die week waarskuwings uitgereik het, vir sterk tot stormsterk suidwestewinde van 60- tot 70 kilometer per uur aan die suidkus met deinings van tussen vyf en sewe meter hoog.
Dorpe en stede soos Gordonsbaai, Stilbaai, Danabaai, Heroldsbaai en Jongenfontein is veral geraak.
Gemeenskappe in die kusgebiede word aangeraai om vandag steeds op ‘n hoë gereedheidsgrondslag te wees en veral tydens hooggety weg van die water af te bly.
