11 Mei 2023
‘n Laerskool in Newport in Wallis het ‘n brief aan ouers gestuur waarin hulle weer ‘n beroep op ouers doen om nié toe te laat dat hulle kinders die nuwe Prime-energiedrankie inneem nie.
Dít kom nadat ‘n laerskoolleerling na bewering ‘n hartaanval gehad het nadat hy die drankie gedrink het. Volgens die Milton Laerskool moes die kind se maag gepomp word. Volgens die ouer gaan dit beter met die kind, maar meen ouers moet opnuut gewaarsku word.
LEES OOK: PRIME-DRANKIES MOET VERBIED WORD, VRA ONDERWYSORGANISASIES
Die energiedrankie het vir groot opspraak gesorg weens die feit dat twee gewilde YouYube meningsvormers, KSI en Logan Paul dit bemark het. Die drankie is verlede jaar in Engeland bekend gestel en was in ‘n stadium in Suid-Afrika te koop vir tussen R500- en R800. Checkers het egter vroeër vandeesmaand aangekondig dat hulle die drankie teen R40 kan verkoop.
Daar is twee tipes Prime-energiedrankies. Die een in die plastiekbottel bevat geen kafeïen nie, terwyl die Prime in die 355 ml blikkie 140 mg kafeïen bevat. In ‘n 355 ml Red Bull-blikkie is 110 mg se kafeïen.
LEES OOK: SLÉGS BANKREKENINGE MET BAIE ENERGIE KAN DIÉ ENERGIEDRANKIE BEKOSTIG
Gesondheidskenners het vroeër ‘n beroep op ouers gedoen om nie toe te laat dat hulle kinders die drankie drink nie, met talle Britse inkopiesentrums wat hulle eie reëls ingestel het waarin hulle kinders onder 16 jaar verbied om energiedrankies te koop.
Skole in Australië het reeds die drankie in skole verbied, terwyl onderwysorganisasies in Suid-Afrika vra dat dit verbied word.
