21 April 2022
Mzingisi Nkungwana, wat vroeër as die waarnemende bestuurder van Mangaung-metro aangestel is, is met geweld uit sy kantoor in Bloemfontein verwyder.
In ‘n video van die voorval – wat tans die rondte op die sosiale media doen – kan gesien word hoe die hoof van die stad se metropolisie, Israel Kgamanyane, vir Nkungwana rondstamp terwyl hy probeer om hom uit sy kantoor te smyt.
Dit volg nadat die stad se burgemeester, Mxolisi Siyonzana ‘n week gelede in ‘n skrywe aan Nkungwana gevra het dat hy sy pos moet ontruim en alle eiendom van die raad terug besorg, nadat sy kontrak nie hernu is nie en reeds op die 31 Maart vertsryk het..
Nkungwana is die derde bestuurder wat in nege weke in die metro aangestel is.
Die jongste verwikkelinge volg nadat die nasionale regering aangekondig het dat Bloemfontein onder administrasie geplaas gaan word.
Nkungwana het aangedui dat hy ‘n strafsaak by die polisie aanhangig gaan maak.
