31 Augustus 2022
Cope se binnegevegte het vanoggend in ‘n fisiese vuisgeveg ontaard, tydens ‘n perskonferensie waar die leier Mosioua Lekota die leierskapskrisis in die party bespreek het.
Lekota en ander partylede het die media toegespreek, na ‘n stormagtige week waartydens Lekota se skorsing aangekondig is deur die adjunkpresident Willie Madisha, en die woordvoerder Dennis Bloem.
Lekota en die party se nasionale voorsitter Teboho Loate het vandag aangekondig dat Madisha en Bloem eerder geskors is.
Lekota het net begin met die konferensie en het verduidelik dat ‘n paar terugslae die party getref het. Hy het onder meer gesels oor sy diagnose met prostaatkanker toe lede van die party die vertrek binnestorm en houe begin toedien.
