6 Augustus 2024
Vier mense is in hegtenis geneem ná ’n geestelike leier – bekend as pastoor Paseka Motsoeneng – en nog drie verdagtes personeel by ‘n laerskool in Katlehong aangeval het.
Die polisie wou nie bevestig of Motsoeneng ook aangekeer is nie. ‘n Video van die voorval by die Matsediso Laerskool is wyd op sosiale media versprei.
Daar is ook op die wapens – met inbegrip van ‘n vuurwapen en kapmesse wat in ‘n video van die voorval gesien kan word – beslag gelê.
Die voorval hou vermoedelik verband met ‘n dispuut oor beheer en toesig van kinders in dié skool.
‘n Polisiewoordvoerder, kolonel Noxolo Kweza sê meer besonderhede sal binnekort beskikbaar gestel word. Hy sê die verdagtes sal binnekort in die Palm Ridge-landdroshof verskyn.
