13 Julie 2023
Die vermeende brandstigter van die Parlement, Zandile Mafe verskyn weer vandag in die Wes-Kaapse hooggeregshof in Kaapstad.
Hy het tydens vanoggend se sitting ‘n woedeuitbarsting in die hof gehad. Mafe het skreeuend uit die aanhoudingselle gekom en onder meer erken dat hy die parlement gebrand het. Volgens hom het hy dit gedoen omdat hy wil hê die parlement moet na Pretoria of Bloemfontein geskuif word.
Grootskaalse skade is in Januarie 2022 aan die parlementêre gebou aangerig.
LEES OOK: SAAK TEEN ZANDILE MAFE UITGESTEL
Mafe se psigiatriese evaluasie, wat moet bepaal of hy in staat is om die hofverrigtinge te volg en die erns van sy aanklagte kan verstaan, is onlangs afgehandel.
Die voorlegging van sy psigiatriese verslag sal na verwagting ‘n fokuspunt in vandag se verskyning wees.
Mafe het tydens sy uitbarsting ook vir regter Nathan Erasmus gesê dat hy nie bang is vir ‘n lewenslange vonnis nie én te velde getrek teen die wit mense in die land.
