4 Januarie 2022
Die verdagte wat daarvan verdink word dat hy die brand in die parlementsgebou in Kaapstad gestig het, Zandile Christmas Mafe, het vlugtig in die hof verskyn.
Die hof het ‘n aansoek van die staat goedgekeur om die saak vir ‘n week uit te stel om aan die Valke die geleentheid te gee om die saak verder te ondersoek – voordat die verdagte om borgtog gaan aansoek doen.
Tans staar Mafe klagtes van brandstigting, diefstal, huisbraak en ‘n oortreding van die Wet op Nasionale Sleutelpunte in die gesig.
LEES OOK: BRAND BY PARLEMENT IS “PRAGTIG”, SÊ EFF-LP
Daar kan moontlik nóg klagtes bygevoeg word namate die ondersoek vorder.
Mafe se regsverteenwoordiger het aangedui dat dit onregverdig is om hom steeds aan te hou aangesien hy Sondag reeds sy adres aan die ondersoekbeamptes verskaf het en ook geen vlugrisiko inhou nie.
Die staat het aangedui dat hy Mafe se borgtog-aansoek gaan teenstaan.
