2 Oktober 2023
Die video kan sensitiewe kykers ontstel.
Die departement van gesondheid in KwaZulu-Natal sê twee veiligheidswagte is afgedank nadat hulle na bewering ‘n 13-jarige seun in ‘n hospitaal aangerand het.
‘n Video van die voorval word tans wyd op sosiale media versprei. Volgens die gesondheidsdepartement het die voorval verlede Donderdag (28 September) in ‘n hospitaal in Ladysmith plaasgevind.
Die departement sê die wagte is deur ‘n private maatskappy aangestel. Die persoon wat die video opgeneem het, het dit glo gedoen om aan iemand te stuur sodat dit as bewyse kan dien.
Die woordvoerder van die KwaZulu-Natalse gesondheidsdepartement, Ntokozo Maphisa sê ‘n dringende ondersoek is begin sodra hulle van die voorval in kennis gestel is. ‘n Interne dissiplinêre proses is ook begin om die verpleegpersoneel te ondersoek, en waarom hulle nie die voorval gekeer het nie.
Intussen is die pasiënt na ‘n ander hospitaal in Durban oorgeplaas.
